Kukutza eraitsi dute, hori da gaurko errealitate gordina, askorentzat notizi tristea, boterea (ekonomikoa) kudeatzen dutenen indarraren erakusle; pozik egongo dira, bejondeiela.
Ez dute Kukutzak errepresentatzen duena eraitsi, ezta eraitsiko ere, bere izpiritua inoiz baino biziago baitirau, bereziki guztia gertutik bizi izan duten Errekaldeko bizilagunentzat, baita Euskal Herriko txoko guztietatik sentimendu horiek partekatzen ditugun herritarrontzat; baina gaurkoan hona ekarri nahi dudana politiko bati, Bilboko zinegotzi bati entzundako hitzak dira, paradoxikoa baita nola argudio bera erabiliz bi jarrera guztiz desberdinak har ditzaketen ustez herritar guztien alde ari diren horiek.
Kukutza eraistea justifikatzeko propietate pribatua aipatu zuen zinegotziak. Eraikin hura (auskalo aurretik zenbat denboraz hutsik, auskalo nola egongo ziren berari zegozkion zergak eta jabe guztiei dagozkien inguruko lurren zaintza...) herritar batena zen, da; jabeak bere propietateak defendatzeko eta eurekin nahi duena egiteko eskubidea dauka, eta herritar horren beharrak eta eskubideak defendatzen ari omen ziren.
Egoera antzekoan baina modu okerragoan daude ehundaka herritar une honetan. Euren etxebizitza, euren bizimodua ateratzeko bidea (lurrak), jabetza pribatukoak, eurenak soilik direnak kenduko baitizkiete AHTa eraikitzeko. Kasu honetan itxuraz jabetza pribatuaren defentsa ez da lehentasuna duen gaia, hor jabetza pribatua popatik hartzera bidaltzen dute, euren interes ekonomikoen aurka doalako.
Nor engainatu nahi dute, ez dezatela horrelako amarrurik erabili, lehenago edo beranduago darabilten gezurkeria guztia mahaigaineratuko baita.